ravakamalala

"SEDRA"

ravakamalala — Fri, 13 Jun 2008 10:59:49 +0200

....

Ny sedra ange, sakaiza

na ho aiza ianao na ho aiza

tsy orana mitraho ahina hirotoroto

ka iomanantsika hanjairana sarotro...

na lefim-pahavalo

ahina hampimalo

hanevika ny fo, na hampitondra ratra

ka anefena ampinga ho fiarovan-tratra.

Fa donan-kerivaika

tampoka fiantraika

hitsapa ny hamafisan'ny fototra nalevina

sao tsy vodivato madonda sy matevina.

Fa afo mahamay

tsy re fiavy izay

hitsapa ireo akora amin ny fitselany

na tena volamena, na hosoka eto ivelany.

Ka raha tonga tampoka

ny sedra ka manampoka,

eo no andrefeso ny herinao anaty,

sao afona-mololo mirehitra dia maty

Na tanjaka am-panahy

mijoro tsy manahy :

Finoana lalim-paka tsy lefin-korohoro

Fa donim-pitsapana vao mainka koa mijoro.

RADO

Septambra 1993

UNION DE PRIERE

ravakamalala — Wed, 16 Apr 2008 16:07:36 +0200

Andriamanitra dia FITIAVANA. I ravakamalala dia mino tanteraka fa Andriamanitra no mpandahatra ny fiainantsika olombelona, fantany izay mahasoa antsika, ary raha tena matoky azy dia tsy ho very amin izay tokony ho anjarany isika tsirairay avy. Indraindray anefa isika dia sendra ny fitsapana tena mahamay sy marary hany ka velom panontaniana hoe " Nahoana re Andriamanitra ô?" Dia tsy mahita valiny, tsy tokony hahakivy izany fa izao no tadidio "Dieu permet le mal pour un plus grand bien"...

Ka mandalo fitsapana i ravakamalala amin izao fotoana izao satria tsy salama ny zaza entiny am-bohoka, ary raha mihitatra ny tantara dia mety afaka andro vitsivitsy aorian ny aterahany io zaza io dia mety handao antsika. Ny angatahin i ravakamalala amin ny mpitsidika ny blaoginy amin izao fotoana izao ,dia ny mba hitondranareo ambavaka io zaza io mba ho salama, fa tsy misy izay tsy efan Andriamanitra.

Misaotra.

"voan-dalana"

ravakamalala — Mon, 14 Apr 2008 13:40:14 +0200

Ho avy avy any dago i nenitoanayyyyyyyyyyy !!! ka io moa araka ny fomba izay tsy hita izay maharatsy azy dia tsy maintsy manafatra entana foana e! Na ny aty na ny any dago, rehefa hoe misy olona handeha dia marina fa eo ilay hoe maika ny hifankahita fa ny tena mahamaika koa (ary mino mihitsy aho fa iombonako amin ny rehetra io) dia ilay manafatra entana, tssss...

Ka ny ahy efa manomboka ato ny lista :

-anamadinika

-ravitoto

-katsaka voatoto

-vomanga

-fintsa

-volo-katsaka

-macaron

-bonbon côcô

-caca pigeon

-produits an ny homeopharma

-sôkôlà rôbera

-mofo gasin analamahitsy (any ihany an!)

-menakely

-patsa mena

-tsaramaso mena

-voanjobory lena (maty aho fa saika adinoko)

-kabaro

... ( à suivre)

ravitoto sy "côcô"

ravakamalala — Mon, 14 Apr 2008 13:22:17 +0200

Ela ny ela ka tena natsiro ny ravitoto nandrahoiko, apetrako eto ny "recette" sady zaraiko aminareo no jerijereko any aoriana any koa sao adinoko....Zavatra ilaina :

1 / ravitoto gasy (raha tsy manana ravitoto gasy dia ilay saka-saka ireny tsy maninona fa misy toro-hevitra kely : avereno "mixé-na kely ilay izy fa somary masaikasaika izay mantsy izy ireny), raha eto paris moa dia misy ravitoto gasy ao amin ny bazar be

2 / henakisoa (hitako hoe morceau tena mety ny jambonneau na rouelle, na poitrine koa tsy maninona)

3 / tongolo gasy (~~vôniny~~ 4)

4 / siramamy ( sotro lehibe 1 )

5 / sira

6 / boatina "lait de côcô" (eny amin ny sinoa dia efa ahitana an io)

ity amin izay ilay teknika mazika :

endasina tsara ny henakisoa, somary asiana menaka eran ny sotro raha tsy dia matavy loatra ilay hena, rehefa mendy tsara ny hena dia arotsaka ny ravitoto, sy ny sira , ary ny siramamy, asiana rano, ary hidina tsara ny "cocotte" dia avela hiketrika tsara ao!

rehefa akaiky ho masaka iny ny ravitoto sy ny hena naketrika, dia arotsaka amin izay ny tongolo gasy voatoto, sy ny ranona côcô (antsasak ilay boaty ihany an) dia avela hiketrika indray fa tsy mila hidina ny "côcôtte", atao an ilay fomba gasy ilay silany kely iny fotsiny no misokatra, dia miandry eo amin ny antsasak' adiny eo./

aza adino ny manandrana sira fa tsy mahavoa ny ravitoto tsy ampy sira.

Mandrapà an, atao ny couvert, atao ny lasary voatabia, avoaka ny sakay, vonoina ny téléfona , dia ankafizina tsara ny ravitoto, mmmmmmm..........

tsara ireto izany a!! marina e! mbola miraraka ny iviko hatramin izao!

"AN - TANANAO"

ravakamalala — Sun, 06 Apr 2008 13:16:19 +0200

Inty ny tononkalo nosoratan i Dada farany alohan' ny nandaozany antsika tamin ny 22 septambra 2007. Tsy amin alahelo no anoratako azy fa vao maika aza mifanohitra amin izay : FANANTENANA. Faly mihitsy aza aho eto am-panoratana satria na inona na inona ny zava-tsarotra nentiny tamin ny fiainany, tsy nanadino an' Andriamanitra hatramin ny farany izy.

"AN-TANANAO"

An-tananao ry Raiko

No apetrako izao

Ny fanahiko.

Na ny foko na ny saiko,

Toerana eo anilanao no katsahiko

Ny tena zavatra ilaiko

Dia fiainam-baovao

Ho rombahiko

Ka atolory ahy ny baiko

Hampanao ny sitrakao

Fa arahiko

Eny fa hotontosaiko,

Ny teny izay nomeko anao

Tsy tsoahiko.

Fa na sarotra aza efaiko,

Raha ianao no tsy mandao :

Ho SAHIKO.

A.H.L

Ny tena mahavariana ahy amin' ny tranga-javatra toy izao dia ohatran ny mahatsapa hoy aho ny olona ho faty hoe efa ho avy ny androny, sa ve omen' Andriamanitra aingam-panahy manokana ? ... ohatran ny misy zavatra iray foana mantsy mahatonga mieritreritra izany, rehefa tena zohiana aty aoriana avy eo hoe "izay izany no antony nahatonga an' iny olona iny nanao fihetsika toy izay, na nanoratra zavatra toy izao, na nananatra, na .... "Tsaroako koa mantsy talohan ny nahafatesan i Neny dia nanana fijery tena tsy ho adinoko mandrakizay izay izy tamiko, nifandinika nandritra ny minitra vitsivitsy izahay mianaka , ary tena tsapako tamin izay fotoana izay fa nidika zavatra betsaka iny fomba fijeriny ahy iny, tapaka lalan -dra moa izy ka tsy afaka niteny na dia nahatsiaro tena tsara aza, saingy tamin izany moa iza no nieritreritra hoe handao anie izy ity ny ampitson iny? Fa mahagaga e!!!!!

Momba ity tononkalon i dada ity indray dia i Dada moa rehefa manoratra tsy toy ny kalaza lahy tena manam-pahaizana amin io taranja io hoe manankarena voambolana na hoe manana style hoe tena kanto fa ny azy dia tsotra nefa hitako hoe tsara, miantefa ny hafatra, ary tena manaitra. Tsy afaka novakiana tany am-piangonana araka ny faniriako satria taratasy nalefany ho ahy tamin ny paositra ilay izy ka nony niverina taty avy nandevina aho vao voaraiko! Sa sao dia mba hafatra nosoratany tany ~~amin izay misy azy tany~~ aza io ?!?!? ....

Ho an 'ireo izay tena liana, mbola ho avy ny blaogin i A.H.L izay hahitana ny tononkalo rehetra nosoratany (misy aloha tena rediredy be fa tsy maninona, ho soratako ao daholo, iza moa no hotahafin ny zanany amin izay lafiny izay? )